ဦးဝင်းတင်နဲ့ မြန်မာပြည်ရဲ့ နိုင်ငံရေးသစ် လှုပ်ရှားမှု အင်တာဗျူး၊ ဗွီအိုအေ
ဇွန် ၃၊ ၂၀၀၉
မြန်မာနိုင်ငံမှာ လက်ရှိဖြစ်နေတဲ့ နိုင်ငံရေး အခြေအနေကြောင့် အမျိုးသားဒီမိုကရေစီအဖွဲ့ချုပ် အနေနဲ့ နိုင်ငံရေးပုံစံသစ် (New Politics) တရပ် ရှာဖွေရတော့မယ်လို့ ဗဟိုအလုပ်အမှုဆောင် ကော်မတီဝင် ဦးဝင်းတင်က ပြောဆိုနေပါတယ်။
ဒီနိုင်ငံရေးသစ် အယူအဆနဲ့ နိုင်ငံရေးသစ်ရဲ့ အဓိပ္ပါယ်ကို ပိုမိုသိရှိနိုင်ဖို့ ဦးကျော်ဇံသာက ဦးဝင်းတင်ကို ဆက်သွယ် မေးမြန်း ဆွေးနွေးတင်ပြထားပါတယ်။ (၂ဝဝ၉ ခုနှစ်၊ ဇွန်လ (၃) ရက်။ ဗွီအိုအေမြန်မာပိုင်းအစီအစဉ်မှ )
“ဒီလိုဗျ၊New Politics ဆိုတဲ့ အနေ အထားက ကျနော် အမှန်ပြောရရင် စကားလုံးက နည်းနည်းတောင် ကြီးကျယ်သွားတယ်ဗျ။ အဓိပ္ပာယ်အမျိုးမျိုး ဖွင့်လို့ရတာ။ အမှန်ကတော့ ကျနော်တို့က ဘာဖြစ်လို့New Politics လို့ သုံးလည်းဆိုတော့ စကားလုံးမရှိလို့ဗျ။ ဘာဖြစ်လို့လဲဆိုတော့ ဒီရွေးကောက်ပွဲနဲ့ ကျနော်တို့ တည်ရှိနေတဲ့ကြားမှာ စစ်အစိုးရက စကားကြမ်းရင်လည်း ခွင့်ပြုပါဗျာ၊ ခွင့်လွှတ်ပါလို့ တောင်းပန်ရမယ်၊ ပရိသတ်ကို။ ရှင်းရှင်း ပြောရင် သူတို့ကတော့ ရွေးကောက်ပွဲတင်းကုပ်ထဲကို ကျနော်တို့ကို ဆွဲခေါ်တော့မယ်။ မြက်ကျွေးလို့ပဲ ဖြစ်ဖြစ်၊ နဖားကြိုးဆွဲလို့ပဲဖြစ်ဖြစ် ကျနော်တို့ကို ရွေးကောက်ပွဲတင်းကုပ်ထဲကို ဆွဲသွင်းတော့မယ်။ ရှင်းရှင်း ပြောရရင် နိုင်ငံရေး မရှိတော့ဘူး၊ သူတို့ဘက်က ဒီရွေးကောက်ပွဲကာလ။
“အဲဒါကြောင့် ဒီနိုင်ငံရေး မရှိခြင်းကို ကျနော်တို့က နိုင်ငံရေးအစားထိုးမှရမယ် သို့မဟုတ် လည်း ပုံစံတမျိုးရှာရမယ်။ အဲဒါကြောင့် ကျနော်က စကားလုံးကို နည်းနည်း ကြီးကြီးကျယ်ကျယ်ပေ့ါဗျာ၊ နိုင်ငံရေးသစ်တို့ ဘာတို့ဆိုတဲ့ စကားတွေကို ပြောလိုက်ရတာ။ ဆိုလိုတာက ကျနော်တို့ လှုပ်လို့ရှားလို့ ရအောင် လုပ်ရတော့မယ်။ ပုံမှန်နည်းမှန် အခုရှိနေတဲ့ အန်န်အယ်လ်ဒီ၊ အင်န်အယ်လ်ဒီမို့လို့ သီးခြား ပေါ့ဗျာ။ ဥပမာ ၈၈ မျိုးဆက်ကျောင်းသားမို့လို့၊ ဘုန်းကြီးတွေ၊ သံဃာတွေ၊ တိုင်းရင်းသားတွေ၊ ဒါတွေဟာ ကိုယ့်နည်းကိုယ့်ဟန်နဲ့ ကိုယ့်ဘာသာကိုယ်ပဲ
လုပ်နေမယ်ဆိုတဲ့ ပုံစံမျိုးနဲ့တော့ မဖြစ်တော့ဘူး။ အနေအထားသစ်အတိုင်း၊ ပြောင်းလဲလာတဲ့ အနေ အထားအတိုင်း ကျနော်တို့ ဘာတွေလုပ်နိုင်မလဲ ရှာဖို့လိုတယ်လို့ ကျနော်က ယူဆတယ်။”
ဆရာ အဲဒီပုံစံသစ်နဲ့ လှုပ်ရှားလာနိုင်အောင် ဘယ်လိုများ စိတ်ကူးရှိပါသလဲ၊ ဘယ်လိုများ လှုပ်ရှားလာနိုင်ပါသလဲ။
“ကျနော်က တပ်ပေါင်းစုတို့၊ ဘာတုိ့ ဖွဲ့တဲ့ဟာလည်း သိပ်တော့ မမျှော်မှန်းဘူးဗျာ။ ဘာဖြစ်လို့လဲ ဆိုတော့ ဗမာပြည်နိုင်ငံရေးမှာလည်း တပ်ပေါင်းစုတို့၊ ဘာတို့ဆိုတာပြောပြီးတော့ ပျက်တာမဟုတ် ဘူးဆိုရင်တောင် အလုပ်မဖြစ်ဘူး။ ကျနော်ပြောချင်တာက စစ်အစိုးရက ကျနော်တို့အပေါ် ဒီလောက် အထိ တင်းတင်းမာမာနဲ့ သို့မဟုတ်လည်း ပြတ်ပြတ်တောင်းတောင်းနဲ့ ဆက်ဆံနေတဲ့၊ လုပ်ကိုင်နေတဲ့ အခါမျိုးမှာ ကျနော်တို့ အလုပ်ဖြစ်အောင်တော့ အလုပ်ရှာရမယ်လို့ ကျနော်ပြောချင်တာ။ အဲတော့ ပုံစံတခုက ဘာလဲဆိုရင် ကျနော်တို့ လက်တွဲကြရမယ်၊ ဒါပဲ။ ကျနော်တို့တွေ လက်တွဲလုပ်မှ။ လက်တွဲ မလုပ်လို့ကတော့ မရဘူး၊ ညှိမလုပ်လို့ မရဘူး။ အဲတော့ ကျနော်ပြောလေ့ရှိတဲ့ စကားလုံးကတော့ အသံညီအောင် လုပ်ကြစို့၊ အသံညီရင် အလုပ်ညီ လာလိမ့်မယ်။ အလုပ်ညီရင် အမြင့်ဆုံးကတော့ အဖွဲ့တောင် ညီနိုင်တယ်ပေါ့ဗျာ။ စုဖွဲ့မှု ပေါ့ဗျာ၊လက် တွဲမှုက ညီသွားနိုင်တယ်။New Politics က အသံညီဖို့လောက်ကို ကျနော် မှန်းပါတယ်။
“ဘာတွေ ကျနော်တို့ လုပ်မလဲဆိုတာကတော့ ကျနော်ပြောချင်တဲ့ပုံစံက စစ်အာဏာရှင်စနစ် ဆန့်ကျင်ရေးကို မူအားဖြင့် ထားမယ်။ အာဏာရှင်စနစ် မှန်သမျှကို ဆန့်ကျင်မယ်ဆိုတဲ့ဟာ ဒီနေ့အထိ အန်င်အယ်လ်ဒီရဲ့ မူခင်ဗျ။ အလားတူပဲ အခြားအခြားသော အဖွဲ့အစည်းများမှာလည်း ဒီမူက ရှိပြီးသားပဲ။ အဲလိုဆို ဒီမူကို ကျနော်တို့ အခြေခံကြမယ်။ နောက်တခုက ကျနော်တို့ လက်တွဲကြတဲ့၊ လှုပ်ရှားကြတဲ့၊ လုပ်ကိုင်ကြတဲ့နေရာမှာ ကျနော်တို့ရဲ့ဘောင်ဟာ ညီညွတ်ရေးဘောင် ထားမယ်။ ညီညွတ်ရေးအတွက် ကျနော်တို့ မူလေးတွေ ချထားမယ်ပေါ့ဗျာ။ အဲဒီလို ကျနော်တို့ လုပ်လို့ရှိရင် နိုင်ငံရေးသစ်ရဲ့ စကားပြောလို့ရလာမယ်၊ ရှာလို့ ရလာမယ်။ ဦးတည်ချက်လေးတွေ၊ မျက်နှာမူရာလေး တွေ တယောက်နဲ့တယောက် ထိန်းမတ်ပြီး သွားလို့ ရမယ်လို့ ကျနော်ထင်ပါတယ်။ အဲဒီပုံသဏ္ဍာန်က ဒါပဲခင်ဗျ။”
အသံညီရမယ်ဆိုတာ အခု မြန်မာနိုင်ငံမှာ ဒီမိုကရေစီလိုလားတဲ့ အင်အားစုရဲ့အသံ ကွဲလွဲနေလို့လား ဆရာ။ တချို့သူတွေကတော့ အစိုးရနဲ့ ပူးပေါင်းဆောင်ရွက်လိုတဲ့အပိုင်း၊ သူတို့ကတော့ ထားလိုက်ပါတော့။ အများစုက အသံညီမနေဘူးလား၊ အစကတည်းက။
“အသံညီပါတယ်။ မညီဘူးလို့ ကျနော် ပြောတာမဟုတ်ပါဘူး။ အသံညီချင်တယ်ဆိုတာက
ရွေးကောက်ပွဲနီးလာတဲ့အခါကျတော့ ဖောက်ကြတာတွေက အများကြီး ပေါ်လာလိမ့်မယ်။ ပွင့်ပွင့် လင်းလင်းပြောမယ်ဗျာ၊ အင်န်အယ်လ်ဒီထဲတောင် မှ ဖောက်တဲ့အသံတွေ မပေါ်ဘူးလို့ ဘယ်သူမှ မပြောနိုင်ဘူး။ ကျနော်တို့မှာ ပဲ့တာတွေ ရှိခဲ့ဖူးပြီ။ မင်္ဂလာဒုံအဖွဲ့တို့၊ ဘာတို့ဆိုတာတွေ ပဲ့ခဲ့ဖူးပြီ။ ဒါမျိုး ဆိုတာက ဘယ်တော့ဖြစ်ဖြစ် ဖြစ်တတ်တဲ့ လက္ခဏာပါ။ အဲတော့ ကျနော်တို့က ကိုယ့်ရဲဘော်တွေနဲ့ရော၊ အခြားသော ပါတီအဖွဲ့အစည်းများနဲ့ရော တသွေးတည်း၊ တသံတည်း၊ တစည်းတည်းကို ဖြစ်နေအောင် ကျနော်တို့ စုစည်းဖို့အတွက် အသံညီအောင် လုပ်ဖို့ ဆိုတာ ပြောခြင်းဖြစ်ပါတယ်။”
အဖိတ်အစင်လေးတွေ ရှိတတ်တာကတော့ သဘာဝပဲလို့ ဆရာလည်း ပြောပါတယ်။ အသံညီဖို့ ဆိုတာမှာ အဓိကအားဖြင့် တိုင်ပေးတဲ့လူကတော့ အသံအကျယ်လောင်ဆုံးနဲ့ ညီအောင်လုပ်ပေးရ မယ်လို့ ကျနော်ထင်ပါတယ်။ ဆိုတော့ အမျိုးသား ဒီမိုကရေစီအဖွဲ့ချုပ်အနေနဲ့ အဓိကအားဖြင့် အသံ တိုင်ပေးရမယ့် အဖွဲ့အစည်းဖြစ်ပါတယ်။ ဘယ်လောက်များ တညီတညွတ်တည်း အမျိုးသားဒီမိုကရေစီ အဖွဲ့ချုပ်က သူများကို လွှမ်းမိုးနိုင်အောင် အသံထွက်နိုင်မလဲခင်ဗျ။
အဲဒါနဲ့ပတ်သက်လို့တော့ ကျနော် ပြောနေတာက ကျနော့်သဘောထား၊ အယူအဆ လို့ပဲ ပြောရမှာကိုး။ အင်န်အယ်လ်ဒီရဲ့ Policy မဟုတ် သေးဘူးခင်ဗျ။ ခုနပြောတဲ့ အာဏာရှင်စနစ် ဆန့်ကျင်ရေးကလည်း အင်န်အယ်လ်ဒီရဲ့ မူအနေနဲ့ပဲ ရှိနေတယ်။ အင်န်အယ်လ်ဒီထဲမှာလည်း ညီညွတ်ရေးဆိုတာ မူအားဖြင့် ရှိနေတယ်။ အင်န်အယ်လ်ဒီဟာ အခြားသောအဖွဲ့အစည်းများနဲ့ တွဲလုပ်ရာမှာ၊ ဥပမာ စီအာရ်ပီပီလိုဟာမျိုးမှာ တိုင်းရင်းသား အဖွဲ့အစည်းများနဲ့ တွဲလုပ်နေတယ်။ ဒီဟာ အသံအသစ် မဟုတ်ဘူးခင်ဗျ။ အင်န်အယ်လ်ဒီမှာ ရှိပြီးသားကိစ္စပဲ။ ရှိပြီးသားကိစ္စ၊ ရှိပြီးသားသဘောထား၊ ရှိပြီးသား လမ်းညွှန်တွေ ဖြစ်တဲ့အတွက် အသံက တိုင်ရုံပဲ ရှိတယ်၊ ကျယ်ကျယ်လောင်လောင်လည်း တိုင်နိုင်ပါတယ်။
အင်န်အယ်လ်ဒီက ဒီဘက်ကို လှမ်းဖို့ အတွက် ဘာမှ မခဲယဉ်းဘူးလို့ ကျနော်တော့ ထင်တယ်။ ဒါလည်း ကျနော် အင်န်အယ်လ်ဒီထဲမှာ ပြန်ပြီး ရှင်းပြရမယ့်၊ တင်ပြရမယ့်ဟာတွေပေါ့။ အခုလည်း အင်န်အယ်လ်ဒီရဲ့ ဆုံးဖြတ်ချက်အတိုင်း လိုက်နာပြီး ဆောင်ရွက်ရမယ့် တာဝန်တွေ ကျနော့်မှာ အများကြီး ရှိပါတယ်။ ဒါတွေအတွက် ကျနော်လုပ်မယ်။ အခြားအခြားသော အဖွဲ့အစည်းများမှာလည်း ဒီသဘောထားရှိမှာပဲ။ ဒီသဘောထားရှိမယ်ဆိုရင် ကျနော်က ညှိလို့ရမယ်။ အနည်းဆုံး နိုင်ငံရေးသစ် ပေါ့ဗျာ။”
အင်န်အယ်လ်ဒီကိုတော့ လူအများစုက သုံးသပ်ကြတာက ဒေါ်အောင်ဆန်းစုကြည်မရှိသမျှ ကာလပတ်လုံး၊ ဒေါ်အောင်ဆန်းစုကြည်က အင်န်အယ်လ်ဒီကို ကိုယ်ထိလက်ရောက် ခေါင်းဆောင် နိုင်တဲ့ အခြေအနေမရောက်သမျှ ကာလပတ်လုံး ဘယ်လိုမှ မူဝါဒ တစုံတရာ ပြောင်းလဲလိမ့်မယ် မဟုတ်ဘူး၊ အင်န်အယ်လ်ဒီ လက်ရှိခေါင်းဆောင်ပိုင်းဟာ အင်န်အယ်လ်ဒီ မပြိုကွဲအောင် ထိန်းသိမ်းဖို့ တာဝန်လောက်ကိုပဲ ယူနေတယ်လို့ လူတော်တော်များများ သုံးသပ်ကြပါတယ်။ ဒီလိုအခြေအနေမျိုးမှာ
ဆရာပြောတဲ့ အင်န်အယ်လ်ဒီက ဦးဆောင်ပြီးတော့ တိုင်ပေးလာမယ့် အဖွဲ့အစည်း ဖြစ်နိုင်မယ့် အလား
အလာရော ဘယ်လောက်ရှိပါသလဲ ဆရာ။
ခုနပြောသလို ရှိပါတယ်ဗျာ။ ရှိပါတယ်ဆိုတာ မှန်တယ်၊ ဒီဟာမျိုး မှားတယ်၊ အားနည်း တယ်ဗျာ။ ကျနော်တို့မှာ ခြေကုန်လက်ပန်းကျနေတဲ့ အခြေအနေအထိ ရှိတယ်။ ကျနော်ဘာလို့ ဝန်မခံ နိုင်ရမှာလဲ၊ ဝန်ခံနိုင်ရမှာပေါ့။ ဒါပေမယ့် ကိုယ့်အကြောင်းပြချက်တော့ ရှိမှာပဲ။ ဒီပုဂ္ဂိုလ်များကို အပြစ်တင်ကြမယ်၊ သို့မဟုတ် အန်င်အယ်လ်ဒီကို လက်ညှိုးထိုးကြတာတွေ မရှိဘူးမဟုတ်ဘူး ရှိတယ်။ ဒါတွေအတွက် ဘာမှ ကျနော်တို့ ငြင်းကွယ်နေ၊ ဖုံးကွယ်နေစရာအကြောင်း မရှိဘူး။ ဖြေရှင်းနိုင်ရင်တော့ ကျနော်တို့ ဖြေရှင်းမယ်ပေါ့ဗျာ။ ကျနော်တို့ ပြောနိုင်တာတွေ ပြောမယ်။
ဒါပေမယ့် သေချာတာတခုကတော့ အင်န်အယ်လ်ဒီဟာ ညီညွတ်ရေးဆိုတဲ့ အခြေခံပေါ်မှာ ရပ်တည်ပြီး တလျှောက်လုံးနေခဲ့တယ်။ ဒီဟာ နောက်ဆုံးပိတ် ရွှေဂုံတိုင်အစည်းအဝေးမှာ ကျနော့်ရဲ့ မိန့်ခွန်းထဲမှာ ညီညွတ်ရေးကို လုပ်ပါ၊ အခြေခံမူတွေကို ကိုင်စွဲပါ၊ မူလမူဝါဒတွေကို ကိုင်စွဲပါ၊ ပြီးတော့ လူထုကို မျက်နှာမူတဲ့ နိုင်ငံရေးကို လုပ်ပါလို့ ကျနော် ထည့်ပြောခဲ့တယ်။ ဆိုလိုတာက ညီညွတ်ရေးကိစ္စ ကျနော်တို့မှာ အခိုင်အမာရှိတယ်။ စစ်အာဏာရှင်စနစ်ကို ဆန့်ကျင်ဖို့ဟာလည်း ကျနော်တို့ရဲ့ ပဋိညာဉ်ဗျ၊ မူအရ နဂိုမူ။ အဲတော့ ဒီဟာကို အသံတိုင်ပေးဖို့ဟာ ဒီဟာတွေ နဂိုရှိပြီးသားဖြစ်နေတဲ့ အဖွဲ့အစည်းတခုအနေနဲ့ အသံတိုင်စရာ ဘာမှ မခက်ခဲပါဘူး။ ကျနော် အဲလိုပဲ ပြောချင်ပါတယ်။ ဒေါ်စုရှိရင်တော့ အကောင်းဆုံးပေါ့ဗျာ။
နောက်တခုမေးချင်တာက လူထုနဲ့ပတ်သက်ပါတယ်။ စောစောက ဆရာလည်း ပြောပါတယ်။ ဆရာ့ရဲ့ ရွှေဂုံတိုင်မိန့်ခွန်းထဲမှာ လူထုကို မျက်နှာမူပြီး လုပ်ရမယ်။ တချို့သုံးသပ်တဲ့နေရာမှာ အမျိုးသားဒီမိုကရေစီအဖွဲ့ချုပ်ဟာ လူထုထောက်ခံမှု အများကြီးရှိတယ်၊ ဥပမာ အိန္ဒိယမှာ မဟတ္တမဂန္ဒီတို့ ဦးဆောင်ပြီး တော့ လွတ်လပ်ရေးတိုက်ပွဲမှာ လုပ်ခဲ့တယ်။ သူတို့က လူထုကို ဦးဆောင်ပြီးတော့ ဘာလုပ်ပါ၊ ဥပမာအားဖြင့် နိုင်ငံခြားသား အဝတ်အစား မဝတ်နဲ့၊ ဘယ်ကဲ့သို့ လုပ်ပါဟဲ့၊ သပိတ်မှောက်ဆူပူဆိုပြီးတော့ လူထုကို ဆွဲဆောင်ပြီး လူထုနဲ့ တွဲတိုက်တာ ရှိပါတယ်။ ဆိုတော့ ဆရာပြောတဲ့ နိုင်ငံရေးသစ်ဆိုတာမျိုး ဖြစ်လာခဲ့ရင် လူထုရဲ့အခန်းကဏ္ဍကိုရော လူထုကို မျက်နှာမူတယ်ဆိုတဲ့နေရာမှာ ဘယ်လိုပုံစံမျိုး ဖြစ်လာမလဲ။ လူထုကို တသားတည်း ပါဝင်လာအောင် အဲလို ဆွဲခေါ်မယ့်သဘော ရှိပါသလား။
“အဲဒါတွေကို ပြောတဲ့နေရာမှာ ကျနော်တို့က တခါတလေကျတော့ ခုနပြောသလို ကျနော်
တို့နိုင်ငံမှာ တွက်တဲ့ဟာတွေ အကုန်လုံးက ခေါင်းဆောင်ပိုင်းတို့၊ ဌာနချုပ်တို့ဆိုတာတွေထက် ကျနော်မြင်တာကတော့ အင်န်အယ်လ်ဒီဆိုတဲ့ အမည်ခံထားတဲ့ လူတွေ၊ အင်န်အယ်လ်ဒီ အင်အားစုတွေ ဘာတွေလုပ်နေသလဲ၊ ဒီလူတွေထဲက လုပ်နိုင်တာ လုပ်နေတယ်၊ မပျောက်ဘူး။ ဆိုလိုတာက အင်န်အယ်လ်ဒီကတော့ အကြောင်း အခြေအနေ အမျိုးမျိုး တွက်ရတာပေါ့ဗျာ။ ထားပါတော့၊ ဒါတွေကတော့ ဌာနချုပ်အတွင်းကဟာတွေ အကုန်ပြောလို့ မရဘူး။
သို့သော် တချို့ဟာတွေ ကျနော်တို့က လုပ်လို့မရပေမယ့် ကျနော်တို့ အဖွဲ့ဝင်တွေ လုပ်နေတယ်ဆိုရင်ကို ဒါ အင်န်အယ်လ်ဒီ လုပ်နေတာပဲဗျ။ ဆိုပါတော့ဗျာ၊ အခု မိတ္ထီလာခရိုင်က လုပ်တဲ့လူတွေ၊ ရဲဘော်တွေ လုပ်နေကြတယ်။ ဒါတွေက ကျနော်တို့ အဖွဲ့ဝင်တွေဗျ၊ ကျနော်တို့ အင်အားတွေ။ Headquarter ဆိုပြီး အမည်ခံခြင်း မခံခြင်းက တပိုင်း။ ကျနော့်ရဲဘော်တွေ၊ အင်န်အယ်လ်ဒီ အလံတော်အောက်မှာ ရှိနေတဲ့အဖွဲ့အစည်းတွေ။ ဒီအဖွဲ့အစည်းတွေက လူထုကိစ္စနဲ့ပတ်သက်ပြီး လုပ်နေကြတယ်။ လူထုကို မျက်နှာမူတဲ့ နိုင်ငံရေးတွေ လုပ်နေကြပြီဗျ။ ဒါတွေကို ကျနော်တို့က ကိုယ့်အဖွဲ့က လုပ်တာပဲ၊ ကိုယ့်လူတွေ လုပ်တာပဲ၊ ကိုယ်တို့လုပ်တာပဲလို့ ပြောချင်တယ်။
အလားတူပဲ တွံတေးမှာ ရဲဘော်တွေရှိတယ်။ ငုံ့ခံမနေဘူး။ ဒီဟာတွေကို ကျနော်တို့ စဉ်းစားတဲ့အခါမှာ ဒေါ်စုရှိရင်တော့ အကောင်းဆုံးပေါ့ဗျာ။ ဒေါ်စုလမ်းညွှန်တွေက ကျနော်တို့ဆီမှာ ရှိပြီးသား ဖြစ်နေပြီ။ ဒေါ်စုရဲ့ခေါင်းဆောင်မှု အရည်အသွေးတွေ၊ စံနမူနာ စံနှုန်းတွေက ကျနော်တို့လက်
ထဲမှာ ရှိနေပြီ။ ဒေါ်စု တိုက်တွန်းခဲ့တဲ့၊ မျှော်မှန်းခဲ့တဲ့ ညီညွတ်ရေးအားတွေက ကျနော်တို့ဆီမှာ ရှိနေပြီ။
စဉ်းစားကြည့်ဗျာ၊ နှစ်ပေါင်း၂ဝ လုံးလုံး ဒီပါတီဟာ အစဉ်လေးတွေ၊ အလွင့်လေးတွေတော့ ရှိတာပေါ့
ဗျာ၊ မင်္ဂလာဒုံအဖွဲ့လိုဟာမျိုး၊ ဒီလိုလေးတွေတော့ ရှိတာပေါ့။ သို့သော် ကျနော်တို့ ကွဲပြဲတာ မရှိဘူးဗျ။
ဒီနေ့အထိ ပါတီမကွဲသေးဘူးဗျ။ ဗမာပြည် နိုင်ငံရေး ရာဇဝင်မှာ ဒီလိုဟာမျိုး တွေ့မလား၊ မတွေ့ဘူး၊
မလွယ်ဘူး။ အဲတော့ ကျနော်ကတော့ စိတ်မပျက်ဘူး။
ခုန ခင်ဗျားပြောတဲ့ အင်န်အယ်လ်ဒီဟာ အသံတိုင်နိုင်ပါ့မလားဆိုရင် ကျနော်ကတော့ ပြောမှာပဲ၊ တိုင်နိုင်တယ်။ ဘာလို့တိုင်နိုင်လဲဆိုရင် အင်န်အယ်လ်ဒီဟာ ဒီအပေါ်မှာ၊ မူလအပေါ်မှာပဲ ရှိနေတယ်။ အာဏာရှင်စနစ် ဆန့်ကျင်ရေးနဲ့ ညီညွတ်ရေးအခြေခံပေါ်မှာပဲ အန်င်အယ်လ်ဒီက တလျှောက်လုံးရှိခဲ့တယ်။ ဆိုတော့ ကျနော်တို့က အသံတိုးတာပဲရှိမယ်၊ တိုးရင် ကျယ်အောင်လုပ်ရမှာ ပေါ့ဗျာ။ ဒါပဲလို့ ကျနော် ထင်ပါတယ်။”
No comments:
Post a Comment